Gute Bio Wi vom Coop

by Joggi 18. November 2010 07:10

Dä Montepulciano D'Abruzzo Jasci find ich no en solidä feine Wi wo nöd so tür isch. Dä chan ich problemlos ufstellä und er choscht so zwüsche 8 und 13 Frankä.
Usserdäm isch er nöd ersch Bio sit geschter sonder sit 1996, das isch au no wichtig.

 

Tags:

Wein

Du häsch ja es Chrotähaar im Sack

by Joggi 22. September 2010 06:57

Letschthin isch es inemä Gschpräch um Chrotä gangä. "e Chrot im Hals" isch en Spruch wo mä öppä no ghört.
Bim Jassä früener, wänn öpper viel Glück hät gah, dänn häts amigs gheisse "du häsch aber es Chrotähaar im Sack".
Das isch natürlich scho total einmalig rar und schön, wämä eso es Chrotähaar im Sack hät!

Tags:

Allgemeins

Immobilienblasä i dä Schwiz

by Joggi 6. September 2010 19:30

Sit längerem warnt d'Nationalbank vor änerä Immobilieblasä. Anderi wie dä Chef vom Huseigetümer-Verband oder vo dä Raiffeisenbank gsehnt da kei grossi Problem. Dä Pierin Vincenz seit im Interview vom 5.9.2010 i dä Sonntigszitig, dass d'Raiffeisen nöd systemrelevant isch (mit 15% Marktanteil am Hypothekämärt)  und das wänn es grösseri Problem git, alli andere Bankä ja au betroffä sind.

Das erinnert mi scho sehr ad Hypothekäblasä i dä USA wo alli möglichscht lang händ wöllä s grossig Gschäft machä und no Provisonä inäholä ( will die andereä ja au sglichä mached) und dä Staat luegt dän scho.

 

 

 

Tags:

Politik | Wirtschaft

Söldner i dä Schwiz

by Joggi 17. August 2010 07:30


Vor fasch 500 Jahr hät dä Zwingli dafür kämpft, dass ds Söldnertum (Rislaufä)  id Schwiz (Eidgenossäschaft) verbotä wird. Immerhin für Züri hät er das erreicht und später isches i dä ganz Schwiz verbotä wordä. Das hät au sehr fridlichi Zitä mit sich bracht. Jetzt, quasi übers Hintertürli sind d'Söldner wieder da.
In Basel hät d'Firma Aegis sind Hauptsitz errichtet. Ein Grund isch offebar, dass sie damit Kontrolle us England chönd umga und bi eus laschi Waffägsetzt herrschet. Offebar häts no anderi söttig britischi Firmä i dä Schwiz.
Ich findä, das müesst jetzt gar nöd si, mä söt si verbütä!

Übrigens: Blackwater Worldwide hät sich umtauft und heisst jetzt Xe Services LLC.

Tags: ,

Politik

En Tip für ä Wanderig für 2 Tag

by Joggi 13. August 2010 07:50

Vo Stächelberg im Berner Oberland us gits ä liechtig 2-tages Wanderig hindere is Tal mit ere wunderbarä Sicht uf ganz vili Gletscher.
Mä cha entweder im Cherzehotel Obersteinberg übernachtä oder im Hotel Tschingelhorn (www.tschingelhorn.ch). Bi euserä Wanderig isch s'Cherzähotel bsetzt gsi und mir händ drum im Tschingelhorn
übernachtet. Das isch au sehr schön und romantisch! Es hät viel Tier rundumä und isch nur zFuess zerreichä.
D'Wanderigä gönd je 2.5 Stund, mä cha sie aber au liecht uf 4.5 Stund usbauä. Die Wanderig isch guet beschribä under http://www.wandersite.ch.
Mir häts schaurig guet gfallä, will mä so wäg vom Schuss isch.

Tags: ,

Wanderä

Pensionskasse mit Unterdeckig

by Joggi 16. Juni 2010 07:55

Letschhin han ich ä Statistik zu Pensionskassä und Umwandligssätz gseh. Da gits tatsächlich Pensionskasse, wo ä Unterdeckig händ und glichzitig an Umwandligssatz vo 7. Das isch höcher als 6.8. Statistisch gseh sind beidi Umwandligssätz zhöch, d'Lüt wärdet eifach älter. Mitemä zhöchä Umwandligssatz handlet me sich mit jeder Pensionierig ä potentielli Unterdeckig i, bzw. mä isch zwungä ä sehr hochi Renditä uf em Kapital z'erzielä und das isch halt nöd immer möglich. Mä chas au andersch säge: die, wo pensioniert wärded überchömed Gäld, wos eigentlich gar nöd z'guet händ. Au uf em überobligatorischä Teil händ die Pensionskasse meischtens en z'hochä Umwandligssatz. Die eintä händ dört nur no 5.8, will das besser dä Realität entspricht.
Us minierä Sicht sind die Pensionskasse mit so hochem Umwandligssatz scho fasch grobfahrlässig. Sie ladet sich Verpflichtigä uf, wo sie nur sehr schwär chönd erfüllä. Für die Jungä isch das natürlich en Fruscht nöimäd idszahlä, wo Zuekunft unsicher isch.
Für en Unternämig, wo e Pensionskasse suecht isch es drum wichtig, e gsundi mit emä vernünftigä Umwandligssatz uf em obligatorischä und über-obligatorischä Teil uszwählä. Eigentlich söt mä wahrschienlich sogar wäg-wächslä vo ener Pensionskassä mit z'hohem Umwandligssatz.

Tags: , ,

Wirtschaft

Ds Wort vom Monät: Track Record

by Joggi 2. Juni 2010 17:45

Däm Begriff bin ich grad ä parmal begägnet. D'Mitglieder vom Bundesrat händ schinz ä sehr churzi Tracklist, China lä sehr langi.
Es isch offebar das neui Mass aller Dinge und chunt em Bedürfnis entgäge alles z'mässe und Vergliche (für d'Boni ;-)).
Mit erä riesige Track Record-List isch mer dän eifach dä richtig für Politik und alles. Nur welli Rollä das mä würklich gspielt hät und
und was us dem Record isch wordä bliebt vermutlich undurchsichtig und verborgä.

Wie au immer, au ich due jetzt mini Track Records ufarbeite und uf medial verbreitä ;-)

Tags:

Allgemeins | Politik | Wirtschaft

Golfstrom ris nöd ab

by Joggi 1. Juni 2010 19:41

Dä Ölteppich isch scho beängstigend. Ich begriffe nöd, dass da ä paar BP-Ingeniörä chönd bäschtelä. Wieso wird da nöt es internationals Krisägremium zämägstellt,
wo die Aktion koordingiert und die beschtä Ideeä und Lüt zämäbringt. BP muessti das natrülich zal$.
Mir macht au no dä Golfstrom angst. Dä läbt doch vo dä Erwärmmig vom Wasser. Bimenä grosse Ölteppich chönnti sich s'Verhaltä vom Golfstrom änderä oder er chönnti gar schwächer wärde oder abrissä, was für Europa natürlich wahnsinnigi Folgä würdi ha.
Chum Barak Obama, es isch zit, dass du die Sach sälber id Hand nimsch!

Tags:

Natur | Politik | Wirtschaft

...aber bitte keis Schorle

by Joggi 26. Mai 2010 17:50

Ab und zu trink ich gärn än Süessmoscht. I dä letschti wirds aber richtig schwierig so en Süessmoscht überhaupt überzcho. Letschthin han i einä bstellt und die Frau vom Beizli hät mer gantwortet: *mir händ aber nur Schorle". "Dän lieber nöd!" isch mini Antwort. Sie hät dänn gseit, dass ich a
däm Tag scho dä zweit bin, wo nur en Süessmoscht hät wölle. Ich han dänn an alkoholfreiä Öpfelsaft gno (wägem Auto).
<br>
Schorle isch eifach äs anders Getränk als Süessmost, mit Choläsüri und mir passts nöd. Bim Bstellä säg i drum immer:"En Süessmost, aber bitte keis Schorle".

Tags:

Ässä | Trinkä

Sparglä vo Hand ässä

by Joggi 23. Mai 2010 04:57

Früener hät mä d'Sparglä vo hand gässe. Ein Grund isch gsi, das d'Silbermässer oxidiert händ, wänds mit em Spargel i Berührig cho sind. Es hät es Schäli laufwarms Wasser mit emä Zitronäschnitz dazu gäh, wo mä ab und zu sind Fingerspitzä hät chönä tünklä. Als Chind han ich das total gnossä, will mä ändlich mal vo Hand hät chönä ässä. Viel hämer natürlich döt nonig Sparglä gha.

Mini Grossmuetter häts offäbar au nöt kännt gha. Sie hät amä Fäscht i dä 80zger Jahr mal gmeint gha, das Schäli Wasser seig ä Suppä.

Leider isch dä Spargel fasch ächli wenig grüschtet und kochet, will mä d'Faserä weniger märkt, wän mä sie verschnidet.

Ich issä dä Spargel immer no vo Hand, wänns möglich isch. Es macht eifach me Spass und hät öppis ursprünglichs und elementars. Und Restaurants chönted damit au än Unterschied und es Erläbnis schaffä!

Übrigens stimmts öpä:
Isch die Kirsche rot, ist der Spargel tot.

Tags: ,

Ässä

Powered by BlogEngine.NET 2.9.1.0
Theme by Mads Kristensen | Modified by Mooglegiant