Rosso

by Joggi 17. Mai 2010 22:11

Letscht Wuchä sind mir inera Pizzeria bim Bahnhof Hardbrugg gsi. Sie isch echli schwierig zfindä inerä altä Induschtriehalle mit eme Chminée i dä Mitti und langä Tisch zum dra hockä. Mir gfallt d'Ambiance. D'Pizza isch fein, nur dä Rand isch ächli zfin und knusprig und dä Patrick hät gfundä, dasses im Teig ä bizzli zwenig Salz hät. Es hät auch guetä Wi!
Mir händ Glück gha, das mer überhaupt en Platz gfundeä händ, sie isch offäbar im Trend. Ich glaub es isch besser wän me reserviert.
Bim Usägah han ich no gfräget, wie die Beiz dänn überhaupt heisst? "Rosso" hät er gseit.

Tags:

Ässä

Abstimmig über dä Umwandligssatz

by Joggi 13. März 2010 08:03

Ich han d'Abstimmig leider verpasst und bin zimlich überrascht gsi über dä Usgang. Eigentlich find ichs guet, das me nomal über Büecher muss. Anderersits isch es natürlich dä Jungä Lüt gegenüber total ünfähr, und jede oder jedi wo mit emä hohä Umwandligssatz pensioniert wird chan nachhär die Junge belaschtä. Da chönd dänn Gwärkschafte au nöd hälfä.

Eigentlich verspricht mer besser weniger oder ebä das, wo dä Statistik entspricht, und chas mit Überschüss dänn ufbesserä, als das mer zviel verspricht und bald muess mär dKassänä sanierä.

D'Idee, dass d'Versicherer uf em BVG kei Gwinn dörfed mache, find ich guet. Mä cha nöd am Versichertä optimal dienä und glichzitig d'Aktierenditä optimierä.

Es heikels Isä!

 

Tags: ,

Politik

Berlusconi als Schauspieler?

by Joggi 22. Dezember 2009 07:00

So wie n är zum Auto usgstigä isch mit liedenem Blick und usgfahrenem Chini, das isch scho ä tolli Leischtig gsi. Das hät würkli dä Wäg i alli Mediä gschafft.Besser hät mä das nöd inszenierä chönä.

Uf dänä Film isch es scho chogä komisch, das er sofort es Nastuech uf dä Wündä höt, is Auto stiegt und nachher mit bluetiger Wunde wieder usstiegt und die früschä Wundä nöd blüeted.

Ich cha mer guet vorstellä, das är en sehr guetä Schauspiler mit ämä schlächtä Maskäbildner isch, und das er sich jetzt uf zwei schöni Feriäwuchä igstellt hät. 

 

 

 

Tags:

Politik

Gold ETF

by Joggi 3. Dezember 2009 07:10

Im Momänt ischa alles ächli unklar, Dubai, Boykott-Drohigä. Drum han ichs Gfühl es isch nöd schlächt, wämä ächli Gold chauft, wämä cha. Guet fin ich dä GOLD ETF vo dä ZKB mit äm Valor 2439100.

D Prisä sind scho rächt hoch, aber ich han folgendes gläsä zädue:

  • nöd ds Gold isch tür, sondern d'Wärigä sind weniger wärt, will vill Gäld isch inäpumpet wordä.
  • China, Indiä chaufed viel Gold als alternativä zu US-Anleihä.
  • Im nahä Oschtä wird au Gold kauft, wägä Dubai und vermuetlich au wäg dä USA

Drum cha sich dä Gold-Kurs durchus nach obä bewegä. Allerdings würd ichs nöt als Spekulation sondern als Reservä chaufä.

 

Tags:

Gotthard Bier oder besser Birra Gottardo

by Joggi 2. Dezember 2009 18:30

Obla, im Tessin, gnauer ds Faido gits ä nöi Brauerei. Sie machets Gotthard-Bier oder ebä uf italiänisch Birra Gottardo. Sie wänd regional id Konkurrenz zu dä multinationalä Konzern trätä und nachdäm Eichof verchauft wordä isch händ sie sicher au i dä Innerschwiz a gueti Chancä (chamä Schansä besser läsä?). 

Meh däzuä findet mä unter www.birragottardo.ch/

Übrigens isch d Osteria Centrale in Olivone eini vo dä erschtä Beizä, wo das Bier usschänked!

Da chamä nur ToiToiToi wünschä.

Tags:

Ässä | Bier

Immobiliä-Crash i dä Schwiz?

by Joggi 28. Oktober 2009 18:05

Es wird immer no baut. Das Jahr wieder 40000 Wohnigä. Glichzitig mag aber d'Wirtschaft nümä rächt. Entlassigä a jedem Eggä. Das wird sich langsam aber sicher bemärkbar machä. D'Lüt rucked nächer zämä.Türi Wohnigä wärdet ufgäh. Einige ziend wieter.

Ich glaub das wird sehr bald spührbar wärdä. Vor allem au dänn, wänn Zinsä stieged. Das wird für Bankä no heftig.

Hankerum ischs natrülich schön, wänn mä ä Immobiliä hät, wo nöd zfescht belaschtet isch. Anderi Alagä sind nämlich mit der drohendä Invlation nöd umbedingt besser. Insbesondere Obligationä sind dänn vermuetlich kän Ränner!

Aber vielicht chunts ja ganz andersch ;-)

Tags: ,

Wirtschaft

Marc Faber hät dä Durchblick

by Joggi 25. September 2009 22:57

Hüt hani äs Interview mit em Marc Faber ghört. Dä hät scho dä Durchblick. Ich weiss zwar nöd, öb er me bim Keynes oder Friedman izordnä isch. Das isch au nöd so wichtig. Aber er operiert eigentlich eifach mit gsundem Mänschäverstand und überleit, wie sich d'Wirtschaft wird entwicklä. Ufgrund vo dä hochä Verschuldig vo dä USA wo sehr wahrschinlich nö markant wird zunä gseht er mittelfrischtig (so ca 5 Jahr) sehr schwarz für d'Bankäwält und dä Weschtä. Da bliebt ja fasch nur no Gold chaufä und Landwirtschaft betriebä?

Tags: , ,

Wirtschaft

Keynes aktuell und Milton Friedman überholt.

by Joggi 20. September 2009 00:57

Hüt, bi Kafi und Gipfel, han i än Artikel vom Paul Krugman im Tagi-Magi gläsä. Scho spannend wie die Neoliberale Ökonomä vo dä Realität überholt wordä sind. "Niemand hat das voraussehen können" seig än Standardsatz vo dene Ökonomä. Das stimmt aber offäbar klar nöd. Äs händ einig gwarnt und sogar i dä Schwiz häd mä vile frühner scho chönä i dä Tagespräss läsä, dass i dä USA ä Überhitzig im Immobiliämärt drohi.

Aber me stell sich das mal vor: A vilä Universitäte und Hochschuelä sitzed jetzt no Friedman-Ahänger als Professorä und lehred dä Studäntä iri überholtä Theoriä. Es sind sogar ganzi Universitäte voll dävo. Das isch öpä so, wie wänn d'Mathematiker nur no dä TschauSepp theoretisch analysierä würded, oder wänn dAmputationschirurgä nur no am Holzbein würded umä-forschä;-)

 

 

Tags: , ,

Wirtschaft

Ojee, uf em Vrenelis Gärtli häts kei Schnee

by Joggi 18. August 2009 07:32

ich bin nöd grad ganz sicher, aber ds Vrenelis Gärtli gset me nümä rächt. Es hät kei Schnee me druf und es gseht drum ganz andersch us.
Das isch zletscht i däm heissä Summer gsi. Vorhär isch mer das no nie ufgfallä.
Es isch drum erstunlich, wills ja soviel Schnee hät gäh i däm Winter!

Tags:

Natur

Isch no guet zum Trinkä

by Joggi 12. August 2009 02:35

Letschthin han ich äs Valser Viva mit Heidelbeer und Honig trunkä. Das isch ächt no guet (überchumä nüt für die Werbig). Mä dörf eifach bi dä Zutate nöt zgnau luegä.

Tags:

Ässä

Powered by BlogEngine.NET 2.9.1.0
Theme by Mads Kristensen | Modified by Mooglegiant