Camembert de Normandie Sélection vom Migros

by Joggi 17. Januar 2011 18:39

Ich wot ja eigentlich kei Wärbig mache, aber dä isch scho eifach wunderbar. Mängisch isch er sehr rif und mängisch chamen no chli lagerä.Und für das find ich dä gar nöd so tür (6.50 für 250g).

Dä, jetzt grad vor mir isch eifach äs Gedicht!

Tags:

Ässä

...aber bitte keis Schorle

by Joggi 26. Mai 2010 17:50

Ab und zu trink ich gärn än Süessmoscht. I dä letschti wirds aber richtig schwierig so en Süessmoscht überhaupt überzcho. Letschthin han i einä bstellt und die Frau vom Beizli hät mer gantwortet: *mir händ aber nur Schorle". "Dän lieber nöd!" isch mini Antwort. Sie hät dänn gseit, dass ich a
däm Tag scho dä zweit bin, wo nur en Süessmoscht hät wölle. Ich han dänn an alkoholfreiä Öpfelsaft gno (wägem Auto).
<br>
Schorle isch eifach äs anders Getränk als Süessmost, mit Choläsüri und mir passts nöd. Bim Bstellä säg i drum immer:"En Süessmost, aber bitte keis Schorle".

Tags:

Ässä | Trinkä

Sparglä vo Hand ässä

by Joggi 23. Mai 2010 04:57

Früener hät mä d'Sparglä vo hand gässe. Ein Grund isch gsi, das d'Silbermässer oxidiert händ, wänds mit em Spargel i Berührig cho sind. Es hät es Schäli laufwarms Wasser mit emä Zitronäschnitz dazu gäh, wo mä ab und zu sind Fingerspitzä hät chönä tünklä. Als Chind han ich das total gnossä, will mä ändlich mal vo Hand hät chönä ässä. Viel hämer natürlich döt nonig Sparglä gha.

Mini Grossmuetter häts offäbar au nöt kännt gha. Sie hät amä Fäscht i dä 80zger Jahr mal gmeint gha, das Schäli Wasser seig ä Suppä.

Leider isch dä Spargel fasch ächli wenig grüschtet und kochet, will mä d'Faserä weniger märkt, wän mä sie verschnidet.

Ich issä dä Spargel immer no vo Hand, wänns möglich isch. Es macht eifach me Spass und hät öppis ursprünglichs und elementars. Und Restaurants chönted damit au än Unterschied und es Erläbnis schaffä!

Übrigens stimmts öpä:
Isch die Kirsche rot, ist der Spargel tot.

Tags: ,

Ässä

Hüehner als Mietzins

by Joggi 19. Mai 2010 16:03

Letschhin hämer äs feins Hüehnli im Römertopf kochet. Dä Metzger hät das Hühenli selber ghaltä. Kei Batteriehaltig, öppis bsunders und es hät ca CHF 14 kostet.
Ich findä das eigentlich wenig für äs Huhen und eis vomä Grossverteiler isch ja no billiger. Wän ich aber en Mietzins vo zum Bispiel CHF 2100 aluegä, dänn sind das 150 Hüehner. Und pro Tag sind das 5 Hüehner.
Das isch ja wahnsinnig viel. Mä stell sich mal vor, wie mä das als Buur sötti bewärkstellä, das wär ja unmöglich. Und da Vermieter leistet ja eigenlich fasch nüt, insbesondere wänn sHuss scho älter isch.
Ich glaube, dass bi eus es extrems Missverhältnis zwischen Mieti und Husprisä und Läbesmittelprisä härscht. Irgendwänn isch mä wieder froh, wänn mä nu 5 Hüehnli im Monat ch zahlä, bzw. als Vermieter sich mä froh wänn mä 5 Hüehnli überchunt.

Tags:

Ässä | Natur

Rosso

by Joggi 17. Mai 2010 22:11

Letscht Wuchä sind mir inera Pizzeria bim Bahnhof Hardbrugg gsi. Sie isch echli schwierig zfindä inerä altä Induschtriehalle mit eme Chminée i dä Mitti und langä Tisch zum dra hockä. Mir gfallt d'Ambiance. D'Pizza isch fein, nur dä Rand isch ächli zfin und knusprig und dä Patrick hät gfundä, dasses im Teig ä bizzli zwenig Salz hät. Es hät auch guetä Wi!
Mir händ Glück gha, das mer überhaupt en Platz gfundeä händ, sie isch offäbar im Trend. Ich glaub es isch besser wän me reserviert.
Bim Usägah han ich no gfräget, wie die Beiz dänn überhaupt heisst? "Rosso" hät er gseit.

Tags:

Ässä

Gotthard Bier oder besser Birra Gottardo

by Joggi 2. Dezember 2009 18:30

Obla, im Tessin, gnauer ds Faido gits ä nöi Brauerei. Sie machets Gotthard-Bier oder ebä uf italiänisch Birra Gottardo. Sie wänd regional id Konkurrenz zu dä multinationalä Konzern trätä und nachdäm Eichof verchauft wordä isch händ sie sicher au i dä Innerschwiz a gueti Chancä (chamä Schansä besser läsä?). 

Meh däzuä findet mä unter www.birragottardo.ch/

Übrigens isch d Osteria Centrale in Olivone eini vo dä erschtä Beizä, wo das Bier usschänked!

Da chamä nur ToiToiToi wünschä.

Tags:

Ässä | Bier

Isch no guet zum Trinkä

by Joggi 12. August 2009 02:35

Letschthin han ich äs Valser Viva mit Heidelbeer und Honig trunkä. Das isch ächt no guet (überchumä nüt für die Werbig). Mä dörf eifach bi dä Zutate nöt zgnau luegä.

Tags:

Ässä

Schwizer Bier

by Joggi 4. August 2009 07:59

Hüt han ich ä chlini Bierdiskussion bim Sternä am Bellvue gha. Es isch scho so, viel schwizer Bier sind ufkauft wordä und viel Arbeitsplätz drohed no abzwanderä. Zersch isch Fäldschlössli vo Carlsberg überno wordä, will bi Fäldschlössli gäldoptimierendi Investorä igschtigä sind und ä Ufteilig vo Immobiliä und Bier händ wöllä. Letschthin isch Eichhof vo Heineken überno wordä. Vermuetlich ischs Aagebot so attraktiv gsi, dass d'Eigätümer-Familie nöd hät wöllä nei sägä.

S'erschtunlichä isch jetzt aber, dass es wieder viel chlini Bierbrauereiä git, wo ä Nischä gfundä händ. Bim Appäzäller Bier han ich sogar zGfühl, dass sie richtig profitiert händ. Früener hät mä sAppäzäller nur sälta gse. Jetzt cha mä scho a vielnä Ort es Quöllfrösch trinkä. Mini Favoritä sind Paul, Turbinäbräu und appäzäller Quöllfrösch.

 

Tags: , ,

Ässä | Bier | Wirtschaft

Powered by BlogEngine.NET 2.9.1.0
Theme by Mads Kristensen | Modified by Mooglegiant