Bankenplatz Schweiz

by 9. September 2011 16:17

Ich überlege mir grad, wär jetzt no interässä chönt ha, i dä Schwiz gäld azlegä? D'Lüt usem Euro-Rum wänd ja ihres Gäld nöd in Euro alegä, und drum wahrschinlich nöd in CHF und d'Lüt usserhalb vom Euro-Rum wänd sowieso kei Euro? Vermuetlich flüsst jetzt dänn viel Gäld ab?

Guet, es chönt au no sie, dass d'Lüt eifach findet, dä Schwizer Frankä sei billig und uf ä späteri Ufwärtig spekulieräd.

Tags:

Wirtschaft

D'Nationalbank (SNB)

by 7. September 2011 17:35

Ich bin eher en Euro-Skeptiker und drum jetzt au en Frankä-Skeptiker. Was passiert bi dä nächschtä schlächtä Nachrichtä us Griecheland oder Italiä? Wänn dä Euro gägenüber allnä anderä Währige verlührt, dänn blibt dä Schwizer Frankä konstant. Wahrschinlich parkiered dänn vili ihres Gäld in Schwizer Frankä i dä Hoffnig, dä sei no besser, oder d'Nationalbank müess irgendwänn dä Kurs lockerä.

Was passiert dänn, wänn d'Nationalbank dä Kurs muess veränderä? Sie hockt dänn wahrschienlich uf riesige mängä Euro und muess die abwärtä. Das chan dän weh tue, bzw. sie isch dänn viellicht bankrott.

Was passiert, wänn dä Euro zämäbricht? Dänn gilt das au für dä Schwizerfrankä oder mindestens für d'Nationalbank?

Tja, hoffentlich fahrt dä Zug womer eus dra ghänkt händ nöd über dä Abgrund.

Tags:

Wirtschaft

Entwärtig

by Joggi 11. August 2011 16:34

All das Retigsgält, wo jetzt vo dä USA und Europa is Syschtem pumpet wird hät Abwärtig zur Folg. Es isch aber au ä schlichendi Enteignig vo dänä wo öppis gspart händ und natürlich au vo Räntner. Mit em Schwizer Frankä stömer jetzt no guet da. Vermuetlich isches jetzt bald Zit die eint oder anderi günschtigi Aktiä im Euroland oder in dä USA zposchtä. Oder auch Gold. Gold isch immer no relativ konstant gägenüber em Schwizer Frankä. Söttet d'Aktionä vo dä Nationalbank fruchtä, würdi ds'Gold natürlich au stiegä.

Tags:

Politik | Wirtschaft

Anlagekommentar vo dä Bank Wegelin

by Joggi 25. März 2011 04:32

Ich kännä die Bank nöd und bin wohl au kein potentiellä Chund. Aber dä Alagekommentar isch immer spannend zum läsä. Mä hät nöd ds Gfühl es wärd um dä heissi Brei umegred. Das isch erfrüschend,  aber ds Resultat au echli beängstigend.

Aber sicher läsenswärt!

Tags:

Wirtschaft

Euro

by Joggi 11. Januar 2011 17:28

Irgendwie chunts mer vor wie wänn mir alles Schäfli wäred inerä grossä Herdä und nöd märked oder märke wänd, dass demnächst ds Wärigssystem rund umä zämäbricht.
Was nützt, beziehigswies, was chamä profilaktisch machä?
Ich weiss au nöd, wahrschinlich Gold und anderi Währigä (China, Indien, Brasilen) chaufä.

Tags:

Wirtschaft

Immobilienblasä i dä Schwiz

by Joggi 6. September 2010 19:30

Sit längerem warnt d'Nationalbank vor änerä Immobilieblasä. Anderi wie dä Chef vom Huseigetümer-Verband oder vo dä Raiffeisenbank gsehnt da kei grossi Problem. Dä Pierin Vincenz seit im Interview vom 5.9.2010 i dä Sonntigszitig, dass d'Raiffeisen nöd systemrelevant isch (mit 15% Marktanteil am Hypothekämärt)  und das wänn es grösseri Problem git, alli andere Bankä ja au betroffä sind.

Das erinnert mi scho sehr ad Hypothekäblasä i dä USA wo alli möglichscht lang händ wöllä s grossig Gschäft machä und no Provisonä inäholä ( will die andereä ja au sglichä mached) und dä Staat luegt dän scho.

 

 

 

Tags:

Politik | Wirtschaft

Pensionskasse mit Unterdeckig

by Joggi 16. Juni 2010 07:55

Letschhin han ich ä Statistik zu Pensionskassä und Umwandligssätz gseh. Da gits tatsächlich Pensionskasse, wo ä Unterdeckig händ und glichzitig an Umwandligssatz vo 7. Das isch höcher als 6.8. Statistisch gseh sind beidi Umwandligssätz zhöch, d'Lüt wärdet eifach älter. Mitemä zhöchä Umwandligssatz handlet me sich mit jeder Pensionierig ä potentielli Unterdeckig i, bzw. mä isch zwungä ä sehr hochi Renditä uf em Kapital z'erzielä und das isch halt nöd immer möglich. Mä chas au andersch säge: die, wo pensioniert wärded überchömed Gäld, wos eigentlich gar nöd z'guet händ. Au uf em überobligatorischä Teil händ die Pensionskasse meischtens en z'hochä Umwandligssatz. Die eintä händ dört nur no 5.8, will das besser dä Realität entspricht.
Us minierä Sicht sind die Pensionskasse mit so hochem Umwandligssatz scho fasch grobfahrlässig. Sie ladet sich Verpflichtigä uf, wo sie nur sehr schwär chönd erfüllä. Für die Jungä isch das natürlich en Fruscht nöimäd idszahlä, wo Zuekunft unsicher isch.
Für en Unternämig, wo e Pensionskasse suecht isch es drum wichtig, e gsundi mit emä vernünftigä Umwandligssatz uf em obligatorischä und über-obligatorischä Teil uszwählä. Eigentlich söt mä wahrschienlich sogar wäg-wächslä vo ener Pensionskassä mit z'hohem Umwandligssatz.

Tags: , ,

Wirtschaft

Ds Wort vom Monät: Track Record

by Joggi 2. Juni 2010 17:45

Däm Begriff bin ich grad ä parmal begägnet. D'Mitglieder vom Bundesrat händ schinz ä sehr churzi Tracklist, China lä sehr langi.
Es isch offebar das neui Mass aller Dinge und chunt em Bedürfnis entgäge alles z'mässe und Vergliche (für d'Boni ;-)).
Mit erä riesige Track Record-List isch mer dän eifach dä richtig für Politik und alles. Nur welli Rollä das mä würklich gspielt hät und
und was us dem Record isch wordä bliebt vermutlich undurchsichtig und verborgä.

Wie au immer, au ich due jetzt mini Track Records ufarbeite und uf medial verbreitä ;-)

Tags:

Allgemeins | Politik | Wirtschaft

Golfstrom ris nöd ab

by Joggi 1. Juni 2010 19:41

Dä Ölteppich isch scho beängstigend. Ich begriffe nöd, dass da ä paar BP-Ingeniörä chönd bäschtelä. Wieso wird da nöt es internationals Krisägremium zämägstellt,
wo die Aktion koordingiert und die beschtä Ideeä und Lüt zämäbringt. BP muessti das natrülich zal$.
Mir macht au no dä Golfstrom angst. Dä läbt doch vo dä Erwärmmig vom Wasser. Bimenä grosse Ölteppich chönnti sich s'Verhaltä vom Golfstrom änderä oder er chönnti gar schwächer wärde oder abrissä, was für Europa natürlich wahnsinnigi Folgä würdi ha.
Chum Barak Obama, es isch zit, dass du die Sach sälber id Hand nimsch!

Tags:

Natur | Politik | Wirtschaft

Euro

by Joggi 20. Mai 2010 16:57

Mol, das fini guet, dass dä Lärverchauf uf gwüssä Aktiä und CDS (Credit Default Swaps, was au immer das isch)  verbotä wird. Das nimmt sicher en Teil vo dä Spekulation usä.
Öb au d'Euro-Spekulation dadermit verhinderät wärdä weiss ich aberi nöd.

Tags:

Politik | Wirtschaft

Powered by BlogEngine.NET 2.9.1.0
Theme by Mads Kristensen | Modified by Mooglegiant